Monday, June 8, 2015

නිමාලි! තව හයියෙන් දුවමු!

http://thecolombopost.net/?p=140553
ඉහත ලින්ක් එක එක්ක මගේ මුහුණු පොතේ තිබුණු මේ සටහන වෙබ් එකට දාන්න යෝජනා වුණා.ඊට පස්සෙ මම යෝජනා කරලා ස්ථිර කරලා මගේ බ්ලොග් එකට දාන්න තීරණය කළා.

Nimaliනිමාලි අද දවසම කතා වෙන මාතෘකාවක්.ඒ රටක් වටින කෙල්ලෙක් විදිහට.මීට අවුරුදු හය හතකට උඩදි මේ හැකියාවන් ඔක්කොම තියා ගෙන මේ කෙල්ල පිට්ටනියෙන් හැංගෙන්න හැදුවා.ඒවට නොයෙකුත් මානවීය තර්ක ගෙනාවා. සූරියවැව ඉදන් උදේ බස් එකේ කොළඹ ඇවිත් සුගතදාසෙ පෙර පුහුණු ට්‍රැක් එකේ නිදාගෙන විවේක අරගෙන තරග කරලා දිනලා ආපහු සූරියවැව යනවා කියන එක පහසු දෙයක් නෙමෙයි. කොච්චර දිනුවත් ජීවිතයට එකතු වෙන පහසුකමක් නැහැ. ගෙදර මිනිස්සු අමාරුවෙන් හම්බකරලා දෙන තුට්ටු දෙක බස්වලට පුදනවට වැඩිය දෙයක් වෙන්නෙ නැහැ. එකා එකා පහු කරලා දිණුම් කණුවට එන එක ඇරෙන්න ජීවිතයට එකතු වෙන දිණුමක් නැහැ. මේ සිතුවිල්ල එක පාරට එළියට දාන්නෙ නැතුව අතිශයින් මානුශික හේතු ඉදිරිපත් කරන නිමාලි ගැන පළමු අකුරු ටික පත්තරේට ලියපු දවසෙ ඉදල මං ගැන පුංචි ගෞරවයකට ආසන්න දෙයක් තිබුණා. ඒ සටහන මං ලිව්වෙ රාවයට.දුර දිවීම කෙට් කලක් ද වගෙ එකක් මම දාලා දුන්නම වෙඩ්ඩා ඒක වෙනස් කළා.
නිමාලි දුවන්නීය…කෙතරම් දුරක්ද? මට මතක එහෙමයි.එදා නිමාලිට දුවන්න උදව් කරන්න කට්ටිය ආවා. වැවේගම ස්කෝලේ විදුහල්පතිතුමා ඒ උදව් කරන්න එන අය ගැන කිව්වෙ මෙහෙම. මගෙ පුතත් ඇක්සිඩන්ට් වෙලා ඉන්නෙ.වෙන කවුරුත් මේක භාර ගන්න ගුරුවරයෙකුත් ස්කෝලෙ නැහැ.ඔබතුමා මේ ලැබෙන දේවල් එකතු කරන වැඩේ භාර ගන්නකො.
ඒත් එක් භාර ගන්න මට අකමැති වෙන්න සිද්ධ වුණා.මට කළමනාකරණයෙන් පුළුවන් වේදිකා පරිපාලනය විතරයි.
ඒත් ප්‍රශ්න උඩින් පැන පැන නිමාලි දිව්වා. වාර්තා තිබ්බා. දිනුවා. ඒත් වෙනසක් නැහැ. නිමාලිට දුවන්න බය හිතෙන පාරභෞතික දේවල් එන්න ගන්නෙ එතන ඉඳලා.
ක්‍රීඩා වෛද්‍ය ඒකකයේ ලාල් ඒකනායක වගේම ශ්‍රී ලංකා ගුවන් හමුදාවෙ වර්ථමාන ගෘප් කපිතාන් දීපාල් මුණසිංහ,පුහුණුකරු සුජිත් අබේසේකර සහ මං මේ වැඩේ අභියෝගයක් විදිහට භාර ගන්නවා.
නිමාලි ඒ අනුව ගුවන් හමුදාවට සම්බන්ධ වෙනවා. මීටර් 3000 බාධක දිවීම ශ්‍රී ලංකා වාර්තාව දුවන දුවන තරගෙදි නිමාලි අතින් අලුත් වෙනවා. මේ අතර නිමාලි ගත කළ කටුක කර්කශම ජීවිතය එක්ක බැඳුණු දේවල් නිමාලි පස්සෙන් හඹා එන්න වෙනවා. ජාතික තරගවලට දුවලා ගෙදර සල්ලි ඉවර කරනවට වැඩිය සූරියවැව වටේ තියෙන අවුරුදු උත්සවවලට දුවන එකයි ඇතැම් වෙලාවට බයිසිකල් රේස් පදින එකයි අතට මොනව හරි දෙයක් ලැබෙන දෙයක් නිසා නිමාලි කෑමක් බිමක් විවේකයක් හිතන්නෙ නැතිව ඒ තරගවලට සහභාගි වෙච්චි ඉතිහාසයක් තිබුණා. ඒ වැරදි පස්සෙන් ඇවිත් නිමාලිගේ උදරයෙන් අල්ලා ගන්නවා.ඇය දුවන හැම වෙලේම වගේ වේදනාවෙන් ඇද වැටෙන්න ගන්නවා.
‘නිමාලි ඉවරයි‘
එහෙම හිතපු අය හිටියා.ඒත් මේ වෙන කොට නිමාලිට දිරිය දෙන්න ඉස්සර තරම් අපිට මහන්සි වෙන්න ඕන කමක් තිබුණෙ නැහැ.
මං ආයෙ දුවනවා නිශ්මං අයියෙ
අපි භාගෙට හිත හදන්න වටින් එබෙන කොට කෙල්ල බොහොම තිර සාරෙට එහෙම කියනවා.
පළවෙනි පඩිය අතට අරං නිමාලි මට කතා කළ හැටි මට තවමත් මතකයි. මාස් දෙක තුනක පඩි දිමනා එකට එකතු වෙලා රුපියල් හැත්තෑපන් දහසක්.
මට නිශ්මං අයියට මොනව හරි අරං දෙන්න ඕනි.
සමහර ක්‍රීඩිකාවො දක්ෂතා අධ්‍යාපනය මත ඉහළ තනතුරු සඳහා යොමු කළ යුතුය කියන තැන ඉදල මං රැකියාවට යොමු කරල ඒව සාර්ථක වුණහම ආයතනයෙන් කතා කරලා කිව්වත් ඒ අය තවම කියලා නැහැ.ඒ අතින් නිමාලි සෑහෙන්න වෙනස්.
මට ඔක්කොම සල්ලි ටික ඕනි.
මං මේ පැත්තෙන් දුරකතනයට උත්තර දෙනවා.
ඇත්තටමද? කමක් නැහැ. මට ආයෙ පඩි ලැබෙනවනෙ. නිශ්මං අයියට දෙන්නම්.
ඇස් ඉක්මනට තෙත් වෙන අසනීපය නිසා මං ඒ වචනත් එක්ක ටික වෙලාවක් ගොළු වුණා.
‘නෑ මට සල්ලි එපා.හැබැයි මේ සල්ලිවලින් උඹ මම කියන දේ කරන්න ඕනි.‘
මගෙ වචනවලට කෙල්ල එහා පැත්තෙන් දුන්නු උත්තරේ තමයි ‘අනිවා‘
ඊට පස්සෙ පුහුණුකරු සුජිත් අබේසේකරගෙ උපදෙසුත් අරගෙන නිමාලි සාමාන්‍ය පෙළ අත හැරුණු කඩඉම ජයගන්න වෙහෙසෙනවා. දුවනවා, ඉගෙන ගන්නවා. ඒ විතරක් නෙමෙයි, සූරියවැව ප්‍රදේශයේ සුජිත් ළඟ දුවන්න එන නිමාලිටත් වඩා අසරණ දරුවො තරගවලට සහභාගි කරවන්න කොළඹ එක්ක ඒමේ වියදම් දරන්නත් නිමාලි භාර ගන්නවා.
හුඟක් දුක් විදලා තැනෙකට ආවම,ආවාට පස්සෙ ඒ පංතියට ගරහන්නෙ උංමයි.
මං වගේම යාළුවො කිහිප දෙනෙකුත් කිහිප අවස්ථාවක ඒ ගැන කතා කරලා තියෙනවා. නැති කාලෙ අසාධාරණ විදිහට තමන්ට අහිමි වෙන දේවල් දිනා දෙන්න සටන් කරපු අය ඉස්සරහම තමන් තැනෙකට ආවාම තමන්ට අයිති නැති දේත්, සාක්කුවෙ ඔබා ගෙන යන්න තරම් පහත් තැන් වලට වැටෙන මානසිකත්වයක් තියෙන මිනිස්සු අතර නිමාලි උසස් වෙන්නෙ මේ තැන්වලින්.
නිමාලි ක්‍රමයෙන් සනීප වෙනවා. සාමාන්‍ය පෙළ සමත් වෙනවා. දැන් ඇය උසස් පෙළ ලියන්නත් උත්සාහ කරනවා. ජාත්‍යන්තර තරග කාල සටහන එක්ක ඒවා පොඩ්ඩක් සසැලෙනවා.
යළි එන නිමාලි පෙරට වඩා ශක්තිමත් කියලයි මං කියන්නෙ. පුළුවන් වෙයිද කියලා අහලා කෙඳිරි ගෑමත් සනීප වෙලා. මං දිනනවා,මට පුළුවන් කියලා හැම දේකටම ඉදිරියට එන ගතියක් අලුත් නිමාලි තුළ තියෙනවා.
ඇය යළි ආවට පස්සෙ දැන් වසර දෙකක් තිස්සෙ තරගකාරි ඉසව්වලදි මිටර් 800 පැරදිලා නැහැ.ආසියානු ග්‍රොන්ප්‍රී තරගාවලියත් දිනුවා.දැන් ඇයගේ බලාපොරොත්තුව මීටර් 800 ඔලිම්පික් පරිසාධනය.
මට හොද රේස් ටිකක් එනවනම් ඔලිම්පික් මෙඩල් එකක් වුණත් බැරි වෙන එකක් නැහැ.
නිමාලි කියන්නෙ බොහොම විශ්වාසයෙන්.
ඒක විශ්වාස කරන්න හේතු…
නිමාලි මීටර් 5000 සිට ජාතික තලයේ ජයග්‍රහණ වාර්තා කළ ක්‍රීඩිකාවක්.දර ගැනීම ඉහළයි.අද මීටර් 800 අංක එක.ඒ වගේම මීටර් 400 අංක දෙක.වේගයත් සතුටුදායකයි.
හොද ස්පීඩ් ට්‍රැක්වල වගේම ජාත්‍යන්තර මට්ටමේ ක්‍රීඩිකාවො එක්කත් රේස් එක බැලැන්ස් කර ගන්න අත්දැකිම් ඕනි.
මේ නිමාලි ගේ උවමනාව…
ඒ උවමනාව ඉටුවන්නේනම් නිමාලි තව දුරටත් දුවන්නීය.එය ලෝකයේ තැන තැන ජය සංඛේත ප්‍රදානයන්හි දි ශ්‍රී ලංකා ධජය ඉහළ යන ජයග්‍රාහී ධාවනයක් වනු සැක නැත.
නිශ්මං අයියෙ බඩගිනියි.
කලෙකට පෙර ජයග්‍රහණයෙන් අනතුරුව මා ළඟ දැවටෙමින් ඇය කියන විට රන්ජන් අයියා (රන්ජන් පරණවිතාන) කී දේ මට මතක ය.
‘මේ වගෙ අත්දැකීම් ලංකාවෙ පත්තරකාරයන්ට අඩුයි නිශ්මං.අතේ සල්ලි තියෙනවද?‍‘
මට මගේ පත්තර ජිවිතයෙ මගේ භාවිතාවන්ට ආශිර්වාද කරන්න ලැබුණු ක්‍රීඩා සංස්කාරකවරුන් දෙදෙනාම මගේ ලිවීමට මෙන්ම භාවිතාවන්ට ද උපකාර කළ අය ය. ඒ මංජුල වෙඩිවර්ධන මෙන්ම රන්ජන් පරණවිතාන ය.
පෑනෙන් පිට කරන තින්ත ටිකට වඩා දෙයක් මේ රටේ ක්‍රීඩාව වෙනුවෙන් මාධ්‍යවේදියකු අතින් සිදු විය යුතු බව මම විශ්වාස කළෙමි. ඒ කිසිවිටෙක ලැබෙන ලාභයක් නිසා නොව රටට ලැබෙන දේ ගැන සිතා සතුටුවන්නට ලැබෙන හැඟීමේ බරට පුරවැසියෙක් ලෙස මම ආදරය කරන බැවිනි.
95029_wkla-nimali-2

‘නිශ්මං අයියගෙ නම කියන්න එපා කිව්වා.‘
මාධ්‍යයක වැඩ සටහනකට සහභාගි වී පැමිණි ක්‍රීඩිකාවක් ඇස්වල කඳුළු පුරවාගෙන පැමිණ කීවාය.
ඒ ඇයි?
ඒ අයගෙ මීඩියා එක ගැන විතරක් කියන්න කිව්වා.
ඒ සමහර මාධ්‍යවල ස්වභාවය මිස මාධ්‍යකරුවාගේ ස්වභාවය නොවන බව මම ඇයට කීවෙමි.මිනිස්සු සහ මනුස්සකම් යට කර තිබෙන මාධ්‍ය අයිතිකරුවන්ගේ යාන්ත්‍රණය එලෙසය.
නිමාලිටත් ඒ වචනම ඇසෙන්නට පුළුවන.
කොච්චර වේගයෙන් දිව්වත් ඒ ක්‍රම සහ විධි පසු කරන්නට නොහැකි බව අප තේරුම් ගත යුතුය.
ප්‍රවෘත්තියක් ප්‍රචාරය කර ලියා පළ කර අත සෝදා ගන්නට අපහසුය.මෙවර ආසියාතික යොවුන් මලල ක්‍රීඩා සූරතාවලියේ ජයග්‍රාහකයන්ට සුගතදාස ධාවන පථයේ තරග සහ පුහුණුවීම් සඳහා පැමිණි විට නවාතැන් සහ ආහාර නොමිළේ ලබා දෙන්නට එහි සභාපතිවරයා එකඟ කරවා ගැනීමට හැකි වූයේ පෞද්ගලිකය ඔහුව හමු වි කරන ලද කරුණු පෙන්වා දීමකින් අනතුරුවය.එසේම මා ඉදිරිපිටම එහි රන් පදක්කම්ලාභිණිය යමානි දුලාංජලී ගේ නිවස ද එතුමාගේ මැදිහත්වීම සහ ක්‍රීඩා අමාත්‍යවරයාගේ උපදෙස් මත ඉදි වෙන්නට නියමිතව ඇත.ක්‍රීඩා අමාත්‍යවරයාටම ප්‍රසිද්ධියේ කළ ඉල්ලීමකට අනුව ඔලිම්පික් පරිසාධන මට්ටමට පිවිසි ක්‍රීඩකයෙක් හෝ ක්‍රීඩිකාවක් සමු ගන්නා විටඒ සමුගැනීම පැවත්වීමේ ඉඩකඩ සුගතදාස බිමේ නොමිලේ ලබා දෙන්නට අමාත්‍යවරයා හකග කර ගැනීමට හැකි විය.
මේ අද ගැනය. නිමාලි ගැන හෙටටත්,අදටත් වඩා හෙට වෙනුවෙන් කළ යුතු දේ බොහෝමය.ඒ සියල්ල මගේ රට ගැන ලෝකය ඉදිරියේ ආඩම්බරයෙන් කතා කරන්නට හේතු සාධක සපයනවා නිසැකය.
නිශ්මං අයියෙ මං දිනුම්!
ඇයගේ හඩ මගේ දුරකතනය ඔස්සේ ඇසෙන විට මගේ පපුව බර වී හුස්ම ගන්නට නොහැකි අයුරෙන් හිර වෙන හැටි විඳින්නට.පාලනය කර ගත නොහැකිව ඇස්විල උතුරා යන හැටි දැනෙන්ට මම ආශාවෙන් බලා සිටිමි.
ආසියානු ග්‍රොන්ප්‍රී තරගාවලියක් මෑත කාලයේ ලංකාවෙ පැවත්වෙන මොහොතක නිමාලි ජය ගනිද්දී මම සීඑස්එන් නාලිකාවේ සජීවී විකාශයේ නිවේදක කටයුතු කරමින් සිටියෙමි. මීටර් 800 ජයග්‍රාහකයා නිමාලි ය .මම වචන සිරවී අර හැඟිම ම විද ගතිමි. විශේෂඥ විස්තර විචාරකයා යෝගානන්ද විජේසුන්දර ය. අපහසුතාවය ළං වෙද්දීම මම නිමාලිගේ තාක්ෂණය පිළිබදව ප්‍රශ්නයක් යෝගා වෙත ඉදිරිපත් කළෙමි.තරගය නිමා වී තත්පර කිහිපයක් යනතුරුත් යෝගාට එය විස්තර කරන්නට කරුණු තිබිණ.
නිමාලි යළි යළිත් ඒ හැඟිම විදින්නට ඇවැසි ය. ඒ සඳහා නුඹ තව හයියෙන් දිව යා යුතුය.
කමෝන් නිමාලි! 

10 comments:

  1. Replies
    1. හඩවල් ගොඩක් එකතු වුණහම ඇය වැඩ පෙන්නයි

      Delete
  2. ආඩම්බරයි නිමාලි ගැන..
    කමෝන් නිමාලි!

    ReplyDelete
  3. Keep up your good work! good people like you would be ultimately rewarded

    ReplyDelete
  4. කාලෙකට පස්සේ නිශ්ම්න් ගේ ලිපියක් කියවන්න ආවා....

    ReplyDelete
    Replies
    1. නිමාලි වගේ දක්ෂ එවුන්ට අත දෙන්න පුළුවන්කම තියෙන ඕන තරම් මිනිස්සු අහක බලං ඉන්නකොට මොන අපහසුකම් මැද්දේ වුනත් වචනෙකින් හරි උදවු කරන නිශ්මන් වගේ එකෙක් දෙන්නෙක් හරි ඉන්න එක , ඉන්නවයි කියල දැනගන්න ලැබෙන එක බොහොම සන්තෝස වෙන්න කාරණයක්.


      Delete
    2. කමෝන් නිමා...
      කමෝන් නිමාලි...

      Delete
    3. ස්තූතියි බෙහෙවින්ම

      Delete